ترغيب الاطفال في المدرسة

at 15/20/2012

ترغيب الاطفال في المدرسة

هنتكلم النهاردة عن شوية نصائح عامة و خبرات سابقة عن موضوع ترغيب طفلك في المدرسة و الدراسة و هنحاول نبعد عن جو اللغة العربية الفصحوى و نبسط الكلام.

طبعأ فيه اطفال بتكون خايفة و متوترة اول يوم في اول يوم مدرسة و فيه اطفال لأ المهم هنتكلم عن شوية نصايح للاب و الام

•             حاولوا تتكلموا مع الطفل و خلوه يتخيل انه رايح رحلة في مكان جديد مع ناس واصحاب جديدة و إنه هيستمتع جدا بالوقت في المدرسة.
• و طريقة الكلام مهمة يعني حسسوا طفلكم انه شخص كبير ناضج و انتو بتتكلموا معاه بس في نفس الوقت بأسلوب بسيط يقدر يفهمه.
• كلموه عن المزايا اللي هيعرفها و الاصحاب الجداد اللي هيعرفهم في المدرسة و يذاكر.  معاهم و يخرج معاهم بعد كده و ياسلام لو فيه اصحاب معاه في النادي او بيمرسوا نفس       الهواية (رسم، موسيقى او اي حاجة هاند مايد) هنا الاطفال هيشجعوا بعض اكتر.
• عرفوهم ان المدرسة بتعمل رحلات في اماكن مختلفة و ممتعة و فيها انشطة كتير مش رايحين بيت الرعب.
• بلاش نجيب سيرة المدرسة بالشر و نوع من انواع العقاب بلاش.
• خالي الطفل يختار ادواته المدرسية بنفسه يعني كنوع من الاعتماد على النفس.
• ياسلام بقى لو اخدتم الطفل لزيارة المدرسة قبل بداية الدراسة.
• لو لسه مأخدتوش قرار لمدرسة معينة خوده الطفل معاكم و انتم بتتفرجوا على المدرسة و إن امكن يختار المدرسة بنفسه.

ترغيب الاطفال في الدراسة

 

اول استفتاح للموضوع يا ريت بلاش سلاح الام المصرية (الشبشب) و الاب المصري (الحزام) واحياة ابوكم تنسوا الحاجات دي سواء في التربية او المذاكرة.

خلاص نسينا الحمد لله ندخل بقى في اللي جايين نتكلم فيه:

• بلاش فكرة المذاكرة 7 او 8 ساعات متواصلة مش حلو الموضوع ده.
• قسيمي وقت طفلك بحيث يقدر يعمل كل حاجة نفسه فيها و يطلع الطاقة الكبيرة اللي جواه يعني شوية مذاكرة شوية نادي او لعب او تمرين او ممارسة هواية بيحبها.
• و زي ما بنكلم الطفل عن اهمية المذاكرة نكلمه عن الرياضة و الحياه و ان الدنيا مش مذاكرة بس يعني كأب و أم تفضلوا اولادكم من الاوائل و المتفوقين في الدراسة بس مفيش اي تفوق في الحياه و المجتمع و منطوي و لا يبقى حتى مستوى متوسط في  الدراسة بس ناجح جدا في المجتمع و الحياه و بيعرف يتكلم و يتعامل مع الناس طبعا الاهل اللي يعرفوا يحققوا المعادلة الصعبة و اولادهم في الدراسة و الحياه متفوقين يبقى المفروض يتعملهم وسام الجمهورية من الدرجة الاولى.
• نموا في اطفالكم الهوايات اللي بيحبها (رسم – رياضة – موسيقى- او حتى فك اللعب و يعمل فيها كهربائي سلسيون) ابحثوا عن الكورسات او المراكز اللي بتنمي المواهب للاطفال و اماكن متخصصة في حاجة معينة علشان يقدر ينميها بلاش تبقى كل حياته من الاول مذاكرة بس و الهوايات دي هتطور اداؤه بشكل كبير في الدراسة.
• اتكلموا مع اولادكم اعرفوا بيفكروا في ايه و ايه اللي حصل معاهم في يومهم في المدرسة صحبوا اولادكم بجد مش مجرد كلام قدام الناس و خلاص و في الحقيقة انتوا متعرفوش عنهم اي حاجة و الكلام ده بلأخص للأب و بلاش اسطوانة دي مسئولية الام دي مسئوليتكم الاب قبل الام.
• حاولوا تقسيمه اهداف او المذاكرة اللي عند اولادكم قطعوها حتت صغيرة الطفل هينجز اكتر و احسن علشان لو سيبنا الموضوع كبير الطفل ممكن يكسل و اصلا الدماغ البشرية بتحب الكسل و الانتخة فالما الطفل يلاقي الموضوع حتت صغيرة و كل لما يخلص جزئ يدخل على اللي بعده مش هيكسل و الموضوع هيبقى اسهل عليه و عليكم.
• بلاش تختاروا لاولادكم مستقبلهم و لا حتى تقليلومنه مهما كانت المهنة حتى لو كان عايز يبقى سباك او نجار او سواق حتى ممكن يبقى هو شايف حاجة حلوة الناس دي بتعملها و عايز يبقى زيهم فدور الاب و الام انهم يوصلوا للحاجة دي و يكبروها و يطوروها في طفلهم و كده كده كل ما الطفل يكبر تفكيره بيتغير و حتى لو متغيرش ممكن يبقى حاجة  جامدة وكبيرة و يغير مفهوم الناس عن الحاجة دي.
• دايما شبهو اطفالكم بالناس المشهورة اللي سابت بصمة في العالم سواء في العلم او الفن او الرياضة ادوهم مثل اعلى.
• دايما قولوا كلام تحفيزي و ايجابي و بلاش اي كلام سلبي و ادولهم اهداف تحفيزية لما يوصلو ليها يبقى ليهم هدية و كل لما تحسوا انه قصر فكروه بالحاجات اللي هياخدها.
• تنوع الهدايا مش كل مرة فلوس يبقى مرة رحلة او لبس او حتى اكلة نفسه فيها.
• بلاش و اولادكم بيذكروا تتفرجوا على التليفزيون او تتكلموا في الموبايل يفضل لو مش بتساعدوهم تقروا كتاب او اي حاجة تحسسهم انهم مش لوحدهم اللي بيذكروا فيتشجعو شوية.
• الربط بقدر المكان بين اللي بيتعلمه و الحياه.
• و آخر حاجة خليكم اصحاب لاولادكم بجد.

يلا شاركونا افكاركم و اقتراحتكم يمكن تكون فكرتك مفيدة لحد 

قبل ما تمشي لو بتقدم لاولادك للمدرسة و محتار تختار ايه او مش عارف المدارس في مصر كويس. 

ادخل على الموقع ده EasySchools

و تابعنا على السوشيال ميديا علشان تعرف كل جديد عن المدارس.

Facebook, Twitter, Linkedin, Instagram, Google-plus